"ލޯތްބާއި، އަޅާލުމާއި، ރައްކާތެރިކަން ލިބުމަކީ ކޮންމެ ކުއްޖެއްގެވެސް ޙައްޤެއް"

ޗިލްޑްރަންސް އޮމްބަޑްސްޕަރސަންގެ އޮފީހުން، ހިންމަފުށީ އައްސޭރި ޖަލުގައި ހުންނަ ޖުވެނައިލް ޑިޓެންޝަން ސެންޓަރަށް ޒިޔާރަތްކޮށްފިއެވެ.

މި ޒިޔާރަތުގައި ޗިލްޑްރަންސް އޮމްބަޑްސްޕަރސަން ނިޢުމާތު ޝަފީޤުގެ އިތުރުން މި އޮފީހުގެ ކޮމްޕްލަޔަންސް އެންޑް އެންފޯސްމަންޓް ޑިޕާޓްމަންޓުން ބައިވެރިވިއެވެ.

ކުޑަކުދިންގެ ޢަދުލުގެ ޤާނޫނުގެ ދަށުން އަލަށް ޤާއިމްކޮށްފައިވާ މި ސެންޓަރަށް ޗިލްޑްރަންސް އޮމްބަޑްސްޕަރސަންގެ އޮފީހުންކުރި މި ޒިޔާރަތުގައި ސެންޓަރު ޤާއިމްކުރާއިރު ފުރިހަމަކުރަންޖެހޭކަމަށް ޤާނޫނުގައި ލާޒިމްކޮށްފައިވާކަންކަން ފުރިހަމަވެފައިވޭތޯ ބަލައި މޮނިޓަރކޮށްފައިވެއެވެ.

އަދި ޖުވެނައިލް ޑިޓެންޝަން ސެންޓަރުގައިތިބި ކުދިންނާއި ބައްދަލުކޮށް އެކުދިންނަށް ޤާނޫނުގެ ދަށުން ކަށަވަރުކޮށްދޭންޖެހޭ ޙައްޤުތަކާއި ލިބެންޖެހޭ ޙިދުމަތްތައް ފޯރުކޮށްދެވޭ މިންވަރު ދެނެގަނެވިފައިވެއެވެ.  މީގެ އިތުރުން ޖުވެނައިލް ޑިޓެންޝަން ސެންޓަރުގެ މަސައްކަތްތަކާއި ގުޅޭގޮތުން ކަރެކްޝަނަލް ސަރވިސްގެ އިސްވެރިންގެ ޓީމަކާވެސް މިޒިޔާރަތުގެ ތެރެއިން ބައްދަލުކޮށްފައިވެއެވެ.

މި ޒިޔާރަތުގައި ޖުވެނައިލް ޑިޓެންޝަން ސެންޓަރުގައި، ކުޑަކުދިންގެ ޙައްޤުތައް ރައްކާތެރިކުރުމުގެ ޤާނޫނާއި ކުޑަކުދިންގެ ޢަދުލުގެ ޤާނޫނު ތަންފީޛުކުރެވޭ މިންވަރު ވަޒަންކޮށް މަޢުލޫމާތު ހޯދާފައިވެއެވެ. އަދި މި ޒިޔާރަތުގައި ލިބުނު މަޢުލޫމާތުގެ އަލީގައި އިޞްލާޙުކޮށް، އިތުރަށް ހަރުދަނާކުރަންޖެހޭ ކަމެއް ފާހަގަކުރެވޭނަމަ، އެކަންކަން ކަމާގުޅޭ ޢިދާރާތަކާއި ޙިއްސާކުރާނެއެވެ. އަދި އެ ޙިއްޞާކުރާ ކަންކަން ތަންފީޛުކުރާ މިންވަރުވެސް ޗިލްޑްރަންސް އޮމްބަޑްސްޕަރސަންގެ އޮފީހުން ގަވާއިދުން މޮނިޓަރކުރަމުންގެންދާނެއެވެ.