"ލޯތްބާއި، އަޅާލުމާއި، ރައްކާތެރިކަން ލިބުމަކީ ކޮންމެ ކުއްޖެއްގެވެސް ޙައްޤެއް"

ޤާނޫނު ނަންބަރު 2019/19 (ކުޑަކުދިންގެ ޙައްޤުތައް ރައްކާތެރިކުރުމުގެ ޤާނޫނު)ގެ ދަށުން 23 ޖުލައި 2020 ގައި ޗިލްޑްރަންސް އޮމްބަޑްސްޕަރސަންގެ އޮފީސް އުފެދި މި އަދަކީ މި އޮފީސް ވުޖޫދުވިތާ 2 އަހަރު ފުރޭ ދުވަހެވެ. މި އޮފީހުގެ މައިގަނޑު މަސްޢޫލިއްޔަތުތަކަކީ ކުޑަކުދިންގެ ޙައްޤުތައް ރައްކާތެރިކުރުމުގެ ޤާނޫނާއި، އ.ދ ގެ ކުޑަކުދިންގެ ހައްޤުތަކާބެހޭ ބައިނަލްއަޤްވާމީ މުޢާހަދާއަށް ދައުލަތުގެ މުއައްސަސާތައް ޢަމަލު ކުރާ މިންވަރު ދެނެގަތުމާއި، ދިވެހިރާއްޖޭގައި ކުޑަކުދިންގެ ޙައްޤުތައް ރައްކާތެރިކޮށްދިނުމުގައި ޙަރަކާތްތެރިވާ އިދާރާތަކާއި މުވައްޒަފުން މޮނިޓަރކޮށް، އިވެލުއޭޓްކުރުމާއި، ދިވެހިރާއްޖޭގައި ކުޑަކުދިންގެ ޙައްޤުތައް ރައްކާތެރިކޮށްދިނުމުގައި ޙަރަކާތްތެރިވާ އިދާރާތަކާއި މުވައްޒަފުންގެ ޢަމަލުތައް ތަޙުޤީޤުކޮށް މުޠާލިޢާކުރުމެވެ.

މި ދުވަސް ފާހަގަކުރުމުގެ ގޮތުން ޗިލްޑްރަންސް އޮމްބަޑްސްޕަރސަންގެ އޮފީހުގެ ރަސްމީ ޓޯލް ފްރީ ނަންބަރު (ހިލޭ ގުޅޭ ނަންބަރު) 1656 ވަނީ އިފުތިތާހްކޮށްފައެވެ. މި ހޮޓްލައިން ނަންބަރުގެ ބޭނުމަކީ އާންމުންނަށް މި އޮފީހަށް މައްސަލަތައް ފަސޭހަކަމާއެކު ހުށަހެޅޭނެ އިންތިޒާމެއް ހަމަޖެއްސުމެވެ.

މި އޮފީހުން ތަޙްޤީޤުކުރާނީ ކުޑަކުދިންގެ މަސްލަޙަތު ހިމެނޭ މަސައްކަތްކުރާ ދައުލަތުގެ އިދާރާތަކާއި، އެ އިދާރާތަކުގެ މުވައްޒަފުންގެ އިހުމާލެއް އޮތްކަމަށް ބެލެވޭ މައްސަލަތަކެވެ. މި އޮފީހަށް ކާކުކަން ނޭނގޭނެހެންވެސް މައްސަލަ ހުށަހެޅިދާނެވެ.

މި އޮފިހަށް މައްސަލަ ހުށަހެޅޭނެ ގޮތްތަކަކީ، ޓޯލް ފްރީ ނަންބަރު 1656 ގުޅައިގެންނާއި، [email protected] އަށް އީމެއިލްކޮށްގެންނާއި، "މައްސަލަ ހުށަހަޅާ ފޯމް" މެދުވެރިކޮށްނާއި، ސިޓީ މެދުވެރިކޮށް އަދި އޮފީހަށް ހާޒިރުވެގެނެވެ.