"ލޯތްބާއި، އަޅާލުމާއި، ރައްކާތެރިކަން ލިބުމަކީ ކޮންމެ ކުއްޖެއްގެވެސް ޙައްޤެއް"

ޗިލްޑްރަންސް އޮމްބަޑްސްޕަރސަންގެ އޮފީހުން އަލަށް ކުރިއަށްގެންދާ ޗައިލްޑް ރައިޓްސް ކޮމިއުނިޓީ އޮޑިޓްތައް ފެށުމުގެ ގޮތުން ފުރަތަމަ އޮޑިޓް، އައްޑޫ ސިޓީ ހިތަދޫގައި ކުރިއަށްގެންގޮސްފިއެވެ.

 10 ރަށެއްގައި ކުރިއަށްގެންދާ މިއޮޓިޓްތައް އައްޑޫ ސިޓީ ހިތަދޫން ފަށާފައިވާއިރު، މިއަހަރުގެ ތެރޭގައި އިތުރު 9 ރަށެއްގައި އޮޑިޓްތައް ކުރިއަށްގެންދާނެއެވެ.

މިއީ ސަރުކާރުގެ މުޢައްސަސާތަކުން ކުޑަކުދިންގެ ހައްޤުތައް ރައްކާތެރިކުރުމުގެ ޤާނޫނާއި، އދ. ގެ ކުޑަކުދިންގެ ހައްޤުތައް ރައްކާތެރިކުރުމާގުޅޭ ބައިނަލްއަޤުވާމީ މުއާހަދާ އަދި ކުޑަކުދިންނާއި ގުޅުންހުރި ޤަވާޢިދުތަކަށް ޢަމަލުކުރަމުންދާ މިންވަރު ދެނެގަތުމަށް ޤާނޫނުގައިވާ ގޮތުގެ މަތިން ޗިލްޑްރަންސް އޮމްބަޑްސްޕަރސަންގެ އޮފީހުން ކުރިއަށްގެންގޮސްފައިވާ އޮޑިޓެކެވެ.

އިންޓަވިއު ކުރުމާއި ރިކޯޑްތައް ޗެކްކުރުމުގެ އިތުރުން އިމާރާތްތައް އިންސްޕެކްޓްކޮށްގެން ކުރިއަށްގެންދިޔަ މި އޮޑިޓް ފެށުމުގެ ގޮތުން އިއްޔެވަނީ، އައްޑޫ ސިޓީ ހިތަދޫގައި ހިމެނޭ 2 ސްކޫލްއަކާއި، ހޮސްޕިޓަލް، ފުލުހުން، ކައުންސިލް، ކޯޓު، ރީހެބިލިޓޭޝަން ސެންޓަރ، ފެމެލީ އެންޑް ޗިލްޑްރަން ސަރވިސް ސެންޓަރ (އެފްސީއެސްސީ)އަށް ޒިޔާރަތްކޮށް މައޫލޫމާތު ހޯދާފައެވެ.

އޮޑިޓްކޮށް ނިމުމުން ކޮންމެ ރަށެއްގެ ހިމެނޭ މުއައްސަސާތަކުގެ އޮޑިޓުން ލިބޭ މަޢުލޫމާތުގެ މައްޗަށް ބިނާކޮށް ފާހަގަކުރެވޭކަންކަން އިސްލާހުކުރުމަށްޓަކައި ހުށަހަޅާކަންކަން ޗިލްޑްރަންސް އޮމްބަޑްސްޕަރސަންގެ އޮފީހުން ގުޅުންހުރި ޢިދާރާތަކާއި ޙިއްސާކުރަމުން ގެންދާނެއެވެ. އަދި ހުށައެޅުންތައް ތަންފީޒުކުރެވޭ މިންވަރު ކޮންމެ 3 މަހަކުން މޮނިޓަރކުރާނެއެވެ.

ހިތަދޫގައި ކުރިއަށްގެންދިޔަ ޗައިލްޑް ރައިޓްސް ކޮމިއުނިޓީ އޮޑިޓަށްފަހު، ހިތަދޫގައި ހަރަކާތްތެރިވާ ކުޑަކުދިންގެ މަސްލަޙަތު ހިމާޔަތްކުރުމުގެ މަސައްކަތްކުރާ އިދާރާތަކާއެކު ވޯކްޝޮޕެއްވަނީ ކުރިއަށްގެންގޮސްފައެވެ. އައްޑޫ ހައިސްކޫލްގައި ކުރިއަށްގެންދިޔަ މި ބައްދަލުވުމުގައި މި އޮޑިޓް ކުރިއަށްގެންދިޔަ 8 ޢިދާރާއެއްގެ މުވައްޒަފުންވަނީ ބައިވެރިވެފައެވެ.